Sea Breeze-də Xəzər dənizinin Beynəlxalq Günü qeyd olundu

12 avqust — Xəzər dənizinin Beynəlxalq Günü münasibətilə Sea Breeze-də «EkoSfera» Sosial-Ekoloji Mərkəzinin birgə təşkilatçılığı ilə Caspian Senses Observatory adlı ekoloji və inklüziv proqram keçirilib.

Caspian Senses Observatory — Xəzər dənizinin ictimai əsaslı müşahidəsini həyata keçirən, ekoloji tədqiqatı, citizen science yanaşmasını və inklüzivliyi bir araya gətirən pilot təşəbbüsdür. Proqramın əsas ideyası ondan ibarətdir ki, yaşından, inkişaf xüsusiyyətlərindən və ətraf mühiti qavrama üsulundan asılı olmayaraq hər kəs Xəzərin müşahidəçisi, tədqiqatçısı və qoruyucusu ola bilər.

Proqramın ilk iştirakçıları Sea Breeze-in azyaşlı sakinləri və müxtəlif inkişaf xüsusiyyətlərinə malik dəvətli uşaqlar olub. İnteraktiv tədqiqat stansiyalarında uşaqlar Xəzəri müxtəlif dərk etmə kanalları — görmə, eşitmə, toxunma və qoxu vasitəsilə araşdırıb, sadə ölçmələr aparıb, sahilyanı ərazilərin biomüxtəlifliyi ilə tanış olub, çirklənmə əlamətlərini müşahidə və qeyd etməyi öyrənib, həmçinin çimərlik mühitinin əlçatanlığını araşdırıblar.

Bu yanaşma inklüzivliyə yeni prizmadan baxmağa imkan verir: inklüzivlik yalnız ekoloji tədbirlərdə iştirak üçün əlçatanlığın təmin edilməsi deyil, həm də fərqli dərk etmə üsullarına malik insanların ətraf mühitin müşahidəsində və onun haqqında biliklərin formalaşdırılmasında fəal iştirak edə bilməsidir.

Proqramın fəxri qonağı BMT-nin Ətraf Mühit Proqramının (UNEP) Avropa üzrə regional koordinatoru və Tehran Konvensiyasının Katibliyinin rəhbəri Mahir Əliyev olub. Onun iştirakı yerli uşaq təşəbbüsünün Xəzər dənizinin qorunması, ekoloji monitorinqin inkişaf etdirilməsi və cəmiyyətin onun gələcəyinin qorunmasına cəlb olunması ilə bağlı daha geniş beynəlxalq məqsədlərlə əlaqəsini vurğulayıb.