Azərbaycanda ilk Beach Polo World Cup Sea Breeze-də keçiriləcək

10–13 sentyabr 2026-cı il tarixlərində Sea Breeze-də, The Grand apart-otelinin yaxınlığında Azərbaycanın ilk Beach Polo World Cup — beynəlxalq çimərlik polo turniri keçiriləcək.

Yarış Dream Group, Azərbaycan Atçılıq Federasiyası (ARAF) və World Polo-nun dəstəyi ilə təşkil olunacaq. Turnirdə dörd komanda iştirak edəcək. Bunlar İsveçrədən Team St. Moritz, Rusiyadan Moscow Polo Club, Böyük Britaniyadan Red Star UK və Azərbaycan komandasıdır. Hər komandanın heyətində üç əsas oyunçu və bir ehtiyat oyunçu yer alacaq. Komandaların handikapı 10-dan 13 qola qədər təşkil edəcək.

10 sentyabr tarixində, oyunlardan bir gün əvvəl, Binədə yerləşən Elite Horse and Polo Club-da atların sınaqları keçiriləcək. Daha sonra Sea Breeze-də mətbuat konfransı, eləcə də turnirin komandalarının və tərəfdaşlarının təqdimatı baş tutacaq.

Əsas oyunlar 11–13 sentyabr tarixlərində keçiriləcək. Proqram hər gün saat 16:00-da başlayacaq. 11 və 12 sentyabr tarixlərində iki oyun, 13 sentyabrda isə 3–4-cü və 1–2-ci yerlər uğrunda qarşılaşmalar keçiriləcək. Turnir qaliblərin mükafatlandırılması mərasimi ilə yekunlaşacaq.

Turnirə giriş biletlə həyata keçirilir. Biletləri iTicket vasitəsilə əldə etmək mümkündür.