Sea Breeze-də uşaqlar və bütün ailə üçün animasiya proqramı başlayır

8 avqustdan 8 sentyabradək Sea Breeze-də uşaqlar və bütün ailə üçün yeni animasiya proqramı keçiriləcək. Bazar ertəsi istisna olmaqla, hər gün qonaqları idman oyunları, yaradıcı ustad dərsləri, üz boyama, kvestlər, rəqs proqramları və axşam şouları gözləyir.

Gündüz proqramı saat 10:00-dan 19:00-dək Beach Club ərazisində, hovuzların yaxınlığında keçiriləcək. Saat 20:00-dan 22:00-dək isə qonaqlar padel kortlarının arxasında yerləşən Sport Beach Club ərazisində tematik tamaşaları izləyə biləcəklər.

Hər həftə yeni hekayələr və qəhrəmanlarla zəngin olacaq. Proqram çərçivəsində “Alisa möcüzələr ölkəsində”, “Oyuncaq hekayəsi”, “Peşələr şəhəri”, “Kosmo Şou” interaktiv tamaşaları, “Xilasedici balalar: Qəhrəmanlar şəhəri” oyun şousu, həmçinin məşhur oyun dünyalarından ilhamlanan multimedia çağırış şousu “Oyun başladı” təqdim olunacaq. Bütün tamaşalar interaktiv formatda keçiriləcək və uşaqlar səhnədə baş verənlərin sadəcə izləyicisi deyil, birbaşa iştirakçısı olacaqlar.

Aktivliklərdə iştirak ödənişsizdir və bütün Sea Breeze sakinləri və qonaqları üçün açıqdır. Yeni proqram kurortun yay mövsümünün daha bir hissəsi olaraq ailələrin birlikdə aktiv və maraqlı istirahəti üçün əlavə imkanlar yaradacaq.