Sea Breeze-də Emin Ağalarovun mətbuat konfransı keçirilib

Mayın 21-də The Grand apart-oteldə Sea Breeze kurort şəhərciyinin təsisçisi və sahibi Emin Ağalarov jurnalistlərlə görüşərək, onları maraqlandıran sualları cavablandırıb, qarşıdan gələn “DREAM Fest” beynəlxalq musiqi festivalı ilə bağlı təfərrüatları bölüşüb, həmçinin Sea Breeze boyunca ekskursiya keçirib. 

Mətbuat konfransı zamanı Emin Ağalarov jurnalistlərə bildirib ki, iyulun 23-dən 28-dək Sea Breeze-də keçiriləcək “DREAM Fest” musiqi festivalının ulduz ifaçıları daim yenilənir və beynəlxalq ifaçılarla danışıqlar aparılır. Artıq Müboriz Usmonov və Ceyson Derulonun çıxış tarixi bəlli olub, həmçinin Outlandish, Artik&Asti, Brandon Stone, K-Maro, Mahmut Orhan, Gianni və Elbrus Canmirzoevin də iştirakı təsdiqlənib. Bu il həm xarici, həm də yerli mədəniyyət xadimlərinin yeni ulduz nişanları Şöhrət xiyabanına qoyulacaq. 

“Biz bir az rebrendinq etdik, “Jara” lokal rus brendinə çevrildi, - Emin Ağalarov bildirib, – beynəlxalq layihələr üçün isə “DREAM Fest” ideyasını düşündük. Məncə, gələcəkdə “DREAM TV” və “DREAM Radio” da olacaq. Biz artıq daha çox beynəlxalq konsepsiya ilə Rusiya Federasiyasından kənarda inkişaf edəcəyik”. 

Ekskursiya çərçivəsində Emin Ağalarov “Sea Breeze” kurort şəhərciyinin ərazisindəki qlobal yenilikləri də açıqlayıb. Beləliklə, yeni mövsümün əvvəlinə qədər çimərlik ərazisi xeyli genişlənəcək: hər 300 metrdən bir yeni paltardəyişmə otaqları, 10 mindən çox günəş şezlonqları və 5 min çətir, batut parkı və uşaq meydançaları tikiləcək. 

Sahildə gözəl park yerləri salınıb, gəzinti yerlərini qumdan qorumaq üçün daş maneələr quraşdırılıb. Piyadaların rahatlığı üçün çimərlik boyu yollar genişləndirilib. Qastronomik sahə yenilənəcək və “Restaurants by Emin Agalarov”, “McDonald's” və digər möhtəşəm layihələr ilə tamamlanacaq. 

Yeni əsas yol ilə daxil olduqdan sonra, “Landau” məktəbinin yaxınlığında, bütün qonaqlar üçün pulsuz giriş imkanı olan böyük ictimai çimərlik tikilir. Çimərlik də yay mövsümünün əvvəlində açılacaq. İctimai çimərliyin uzunluğu 1 km, ümumi sahəsi isə 6,5 km olacaq.